Histoire des choses mémorables, sur le fait de la religion Chrétienne/Avertissement
Benoît Rigaud, (p. i-ii).
my Lecteur, ſi i’entends que vous preniés gouſt à ce petit eſchantillon d’histoire, que i’ay (comme à la deſrobee) miſe en François, non pas ſi poli que vous eußiés peut eſtre ſouhaité, & que le ſtile de l’auteur Latin fort exquis, meriteroit, ie taſcheray de me contraindre à continuer d’en traduire d’auantage, meſmes ce qui appartient aux diſcours des affaires du Braſil, & de Iapon, pour voſtre plus grande conſolation, m’aſſeurant que vous en aués autant à faire que moy parmy tant de troubles, & combuſtions que Satan braſſe, & affuste contre l’Egliſe Catholique, que nous deuons tous plus estimer chere que nostre vies, ſur tout en ce tems cy que le Turc la deſchire à grans lambeaux, & la cizaille cruellement à gros tronçons, là où elle estoit iadis ſi ſaine, & entiere, comme au Royaume de Cypre, que noz pechez, helas ! ces deux dernieres annees nous ont preſque emblé, & rauy, pour le mettre entre les execrables mains du Turc, qui eſt l’vn des ſuppoſts en chef, de l’Antechriſt abominable. Dieu ſoit auec vous, & priez le inceſſamment pour le bien public de la Chreſtienté, & notamment de ce Royaume.