Histoire de l'expédition chrestienne/Dédicace
◄ | Histoire de l'expédition chrestienne - Dédicace | Histoire de l'expédition chrestienne - Au lecteur ► |
MESSEIGNEURS
Ayant en main l’histoire de la Chine faicte en Latin par le R. P. Nicolas Trigault de la compagnie de Jesus, & puis en François par le Sr. D. F. de Riquebourg-Trigault, il m’a semblé estre plus que raisonnable vous l’offrir, & la faire marcher souz l’ombre de vostre bien-vueillance, & faveur. Et ce d’autant que c’est une Histoire fort autentique tiree des memoriaux, & papiers que le R. P. Matthieu Ricci de la mesme compagnie avoit laissez. Lequel pour s’estre tenu en la Chine l’espace de 30 ans, a peu cognoistre parfaictement l’estat de ce Royaume ; outre ce que la beauté & rareté du sujet est telle, que toute l’Europe l’admire, & l’a receu avec grandissime contentement, ayant esté imprimé en Allemagne, & depuis en France, & maintenant en vostre ville pour la troisieme edition.
Certainement si l’Histoire, comme dit Ciceron, est celle qui donne tesmoignage des siecles passez, la lumiere de verité, la vie de la memoire, l’adresse de nostre vie, la messagere de l’antiquité : Il m’est advis que tous ceux qui sont appelez appellez aux charges publiques, & maniement d'estat, pour bien s'acquiter de leur devoir, doivent estre versez, en celles, qui contiennent la façon de gouvernement, la meilleure, qui se puisse trouver. Il est vray que les histoires Romaines, & Grecques, qui nous sont plus cognuës, donnent suffisamment dequoy, pour instruire ceux qui prennent la peine de les lire ; mais parce qu'elles sont si familières on les mesprise presques, & on se contente d'en ouyr rapporter par fois quelque piece à propos, ou en sermon, ou en propos familiers.
Toutesfois celle-cy parce qu'elle est nouvelle, & qu'elle vient de l'autre Monde, & ce du bout de l'Orient, & d'un Royaume si policé, qu'il ne cède en rien aux Republiques Grecques & Romaines, mesme les surpasse en beaucoup de choses, qui touchent la bonne police, & l'integrité des Magistrats, j'ose bien presumer qu'elle vous sera tres-agreable, tant pour le soin, & le désir que vous avez de maintenir le bon ordre, & la police de vostre ville, que pource que vous apprendrez en quel point, sont les affaires de la foy Catholique, en ces quartiers là, ou elle commence à poindre, apres si longues ténèbres, au grand contentement de toute la Chrestienté. Je ne le dis pas sans cause, tout le monde scait avec quelle joye vous entendistes, & plusieurs de ceste ville les premières nouvelles de la conversion d'aucuns de ce Royaume, pour la bonne affection que vous portez à la foy de vos ancestres, jusques à monstrer par effect le désir que vous aviez d'avoir part à si genereux desseins, en recevant auec tant d’accueil le R. Pere Trigault : Ce qui m’a aussi esmeu entre autres choses à vous le dédier, Messeigneurs, espérant que ceste mienne offre vous seroit d’autant plus agreable, que plus je cognoissois, l’Auteur de ce livre vous estre affectioné.
De vostre Ville de Lille,
le 27. de Jullet 1617.
serviteur P. D. R.