- HIPPOLYTE
- TRAGEDIE TOURNEE DE SENEQUE
- PAR
- JEAN YEUWAIN MONTOIS
- 1591
Argument
modifierHippolyte fils de Thésée, et d’Antiope Royne des Amazones, s’estant (resolu de fuir toutes sales voluptés) voué au célibat, vivoit chastement, s’exerceant continuellement à la chasse, pour n’estre si facilement surpris par les cauteleuses mignotises des femmes, dont il avoit tout le sexe en horreur. Mais Phedre sa maratre, estant tres ardamment esprise de son amour, à-cause de son excellente beauté, et enhardie par l’absence de Thesée, (qui estoit descendu aux enfers avec Pirithois, pour ravir Proserpine) luy découvre son mal, le sollicita et requerant d’amour. Luy n’y voulant condescendre, ains le reprenant tres-aigrement ; elle change l’amour en hayne et faict calomnieusement à-croire à son mary, qu’il l’avoit forcée : Parquoy le Jouvenceau, pour eviter la fureur de son pere, qui le vouloit occire, monte sur son chariot, et s’enfuit. Mais Thesée sachant qu’il ne pouvoit le r’attaindre, prie son pere Egée dieu marin, que pour s’aquiter des trois souhaits, dont il luy avoit promis les effects, il face mourir Hippolyte. Egée envoyë un grand monstre marin, lequel espouvante les chevaux de telle sorte, qu’ilz trainent leur maistre tombé, et lié entre les traits, parmy les rochers, et le déchirent en pièces. Finalement, Phedre confessant sa traitresse calomnie, et detestant son crime, se tuë misérablement sur le corps démembré d’Hippolyte.