Et se vendent en l’Isle du Palais, à l’Image S. Michel, par la
veusue dudit Hention.
___________________________________________
MDCXXXII.
AVEC PRIVILEGE DU ROY
L’IMPRIMEVR AV LECTEVR
Amy Lecteur voicy le dernier des Œuvres du ſieur Henrion Profeſſeur és Mathematiques, contenant les quinze livres des Elements d’Euclide, traduicts en François, avec des Commentaires beaucoup plus amples & faciles, & des figures mieux taillées qu’en toutes les traductions precedentes : auſquels il a adiouſté le livre des Donnez, du meſme Euclide, außi traduict en François ; ce qui n’avoit point encores eſté faict iuſques icy, quoy que l’uſage de ce livre ſoit fort commun par toutes les Mathematiques, & particulièrement en l’Analiſe, ſcience auiourd’huy tant eſtimee & recherchee, & qui a remis en ce temps la Geometrie en son lustre autant qu’elle y fut iamais, auec eſperance d’une perfection beaucoup plus grande. Cét œuvre eſtoit imprimé dés le vivant de l’Autheur : & ſ’il ne l’a publiee, c’est que son intention eſtoit d’y adiouſter le reſte de ce qui ſe trouve des œuvres d’Euclide, ſçavoir l’Optique, & Catoptrique, les Phenomenes, la Muſique, & un fragment du léger & du peſant, toutes leſquelles parties il avoit deſia traduites, comme en font foy les manuſcripts qu’il a laißés, & qui ſont entre les mains de sa veufve : ainſi il diviſoit toutes les œuvres d’Euclide en deux Tomes, deſquels le premier eſtoit celuy-cy, & le dernier devoit contenir ce que nous avons dict maintenant, dont la premiere feuille eſt deſja imprimee, & le reſte pourra eſtre imprimé cy-après. Cependant reçoy cecy par advance, & te souviens de celuy qui te l’a preparé, lequel la mort à ravy en un temps auquel il pouvoit & vouloit encore beaucoup ſeruir au public. Quant à l’impression, ſa diligence accouſtumee à corriger ses œuvres te peut aſſeurer qu’il y aura peu ou point de fautes : si touteſfois tu en rencontres, il te ſera facile de les corriger ſans accuser l’autheur qui t’auroit exempté de ceſte peine s’il eust veſcu iuſques icy. C’est dequoy ie te supplie : t’aſſurant que ie ſuis de tous les amateurs des Mathematiques.
