Estat de l’Empire de Russie/Privilège du Roy
PRIVILEGE DU ROY.
Ovis par la grace de Dieu Roy de
France et de Nauarre, à nos amez et
feaux Conseillers, les Gens tenans nos
Cours de Parlement, Maistres des Requestes
ordinaires de Nostre Hostel,
Preuost de Paris, Baillifs, Seneschaux, leurs Lieutenans
Ciuils, et autres nos Justiciers et Officiers
qu’il appartiendra, Salut. Nostre bien
amé Jacqves Langlois Imprimeur en nostre
bonne ville de Paris, nous a fait remonstrer
que sous la permission de Henry IV. de glorieuse
memoire nostre tres-honoré Seigneur
et Ayeul, ayant esté imprimé par
Mathiev Gvillemot en l’année 1607. vn Liure intitulé,
Estat de l’Empire de Russie et Grand
Duché de Moscouie, composé par le Capitaine
Margeret, de si bon debit, qu’il ne
s’en est point trouué chez les heritiers du dit
Gvillemot, ny chez aucuns Libraires, quelque
recherche qu’en ayt fait l’Exposant, et plusieurs
autres personnes curieuses de connoistre
ledit Grand Duché de Moscouie, par ce qui en
est rapporté dans le second Volume du Mercure
François, et dit par les Ambassadeurs qui
sont presentement en nostre Cour pour demander
nostre alliance, et lier commerce entre Nos
Subjets et les habitans du dit Grand Duché : ledit
Exposant auroit obtenu du Sieur Margeret,
Conseiller en nos Conseils et Grand Audiencier
de France, petit nepueu dudit Capitaine Margeret, le seul Exemplaire qui reste dans sa
Famille, dudit Liure pour le reimprimer, à
condition de n’y rien changer. Ce que ne voulant
entreprendre sans nos Lettres de Priuilege
particulier, pour empescher que quelqu’autre
ne le priue de son labeur. À ces causes, voulant
fauorablement traitter l’Exposant, Nous
luy auons permis et accordé, permettons et accordons
par ces Presentes, de reimprimer ou
faire reimprimer ledit Liure en tel volume,
marge, caractere, et autant de fois que bon
luy semblera, sans y rien changer, pendant le
temps de douze années consecutiues, à commencer
du jour qu’il sera acheué de reimprimer,
iceluy vendre, faire vendre et debiter par
tout Nostre Royaume. Faisons deffenses à tous
Imprimeurs, Libraires et autres, d’imprimer,
faire imprimer, vendre et distribuer ledit Liure,
sous pretexte d’augmentation, correction,
changement de titre, d’impression estrangere
sur les anciennes copies, ny autrement, en
quelque maniere que ce soit prejudiciable à
l’Exposant, sans son consentement ou de ses
ayans cause, sur peine de confiscation des
Exemplaires contrefaits, mil liures d’amende,
despens, dommages et interests, à la charge
d’en mettre deux Exemplaires en nostre Bibliotheque
publique, vn en nostre Cabinet des Liures
en nostre Chasteau du Louure, et vn en
celle de Nostre tres-cher et feal Cheualier,
Chancelier de France le Sieur Seguier, et de
faire enregistrer ces Presentes és Registres
de la Communauté des Marchands Libraires de
Paris, à peine de nullité du contenu : desquels
vous mandons et enjoignons faire jouyr l’Exposant
et ses ayans cause, pleinement et paisiblement,
cessant et faisant cesser tous troubles
et empeschemens au contraire : Voulons
qu’en mettant au commencement ou à la fin dudit Liure copie des Presentes, elles soient
tenuës pour deuëment signifiées, et qu’aux copies
collationnées par l’vn de nos amez et feaux
Conseillers Secretaires, foy soit adjoûtée comme
à l’Original. Mandons au premier nostre Huissier
ou Sergent, faire pour l’execution des Presentes
toutes significations, defenses, saisies et
autres actes requis et necessaires, sans demander
autre permission ; Car tel est Nostre plaisir.
Donné à Saint Germain en Laye le vingt-troisieme
jour de Septembre, l’an de grace mil six
cens soixante-huict, et de nostre Regne le
vingt-sixieme. Signé, par le Roy en son Conseil,
La Borie, auec grille et paraphe, et
scellé du grand Sceau de sa Majesté à simple
queuë, en cire jaune.
Acheué d’imprimer pour la premiere fois le 8. Octobre 1668.
Les Exemplaires ont esté fournis.
Registré sur le Liure de la Communauté des Imprimeurs et Libraires de Paris, suiuant et conformement à l’Arrest de la Cour de Parlement du 8. Auril 1653. et celuy du Conseil Priué du Roy, du 5. Feurier 1665.