Dans les regards de sa jumelle flame
(Redirigé depuis Dans le serein de sa jumelle flamme)
Dans les regards de sa jumelle flame
III
Dans les regards de sa jumelle flame
Je vis Amour, qui son arc desbandoit,
Et sus mon cœur le brandon espandoit,
Qui des plus froids les mouelles enflame :
Puis çà puis là près les yeux de ma Dame
Entre cent fleurs un ret d’or me tendoit,
Qui tout doré blondement descendoit
A flots crespuz pour enlasser mon ame.
Qu’eussay-je fait ? L’Archer estoit si doux,
Si doux son feu, si doux l’or de ses nouds,
Qu’en leurs filets encore je m’oublie :
Mais cest oubly ne me travaille point,
Tant doucement le doux Archer me poingt,
Le feu me brusle, et l’or crespe me lie.