Congés (Adam de la Halle)
C’EST LI CONGIÉ ADAN D’ARRAS
Comment que men tans aie usé,
M’a me conscienche acusé
Et toudis loé le meillour,
Et tant le m’a dit et rusé
Que j’ai tout soulas refusé
Pour tendre à venir a honnour ;
Mais le tans que j’ai perdu plour,
Las dont j’ai despendu le fleur
Au siècle qui m’a amusé.
Mais ch’a fait forche de Signeur,
Dont chascuns amans de l’erreur
Me doit tenir pour escusé.
Arras, Arras, vile de plait
Et de haïne et de detrait,
Qui soliés estre si nobile,
On va disant qu’on vous refait :
Mais se Diex le bien n’i retrait,
Je ne voi qui vous reconcile,
On i aime trop crois et pile,
Chascuns fu berte en ceste vile,
Au point qu’on estoit à le mait.
Adieu de fois plus de cent mile,
Ailleurs vois oïr l’Evangile,
Car chi fors mentir on ne fait.
Encor soit Arras fourmenés,
Si a il des bons reniés
A cui je vœil prendre congiet,
Qui mains grans reviaus ont menés
Et souvent biaus mengiers donnés,
Dont li usages bien deschiet :
Car on i a si près faukiet
C’on leur a tout caupé le piet
Seur coi leur deduis ert fondés.
Chil ont fait grant mortel pechiet
Qui tant ont a rive sakiet
Que tes viviers est esseués.
Puisque che vient au congié prendre,
Je doi premièrement descendre
A cheus que plus à envis lais :
Aler vœil mon tans miex despendre,
Nature n’est mais en moi tendre
Pour faire cans, ne sons ne lais,
Li an acourchent mes eslais :
De che feroie bien relais
Que je soloie plus chier vendre ;
Trop ai esté entre les lais,
Dont mes damages i est lais,
Miex vient avoir apris c’aprendre.
Adieu, Amours ! tres douche vie,
Li plus joieuse et li plus lie
Qui puist estre fors paradis,
Vous m’avés bien fait en partie,
Se vous m’ostastes de clergie,
Je l’ai par vous ores repris,
Car j’ai en vous le voloir pris
Que je racate los et pris,
Que par vous perdu je n’ai mie ;
Ains ai en vo serviche apris,
Car j’estoie nus et despris
Avant, de toute courtesie.
Bele, très douche amie chière
Je ne puis faire bele chière,
Car plus dolant de vous me part
Que de rien que je laisse arriere.
De mon cuer seres trésorière,
Et li cors ira d’autre part
Aprendre et querre engien et art,
De miex, valoir si arés part
Que miex vaurrai, mieudres vous iere,
Pour miex fructefier plus tart,
De si au tierc an, ou au quart,
Laist on bien se terre à gaskiere.
Congié demant de cuer dolant
Au meilleur et au plus vaillant
D’Arras et tout le plus loial,
Symon Esturion avant,
Sage debonnaire et souffrant,
Large en ostel, preu au cheval,
Compaignon liet et liberal,
Sans mesdit sans fiel et sans mal,
Biau parlier, honneste et riant,
Et si aime d’amour coral :
Je ne sai homme chi aval
Que femes doivent amer tant.
Bien doi avoir en remenbranche
Deus freres en cui j’ai fianche,
Signeur Baude et signeur Robert
Le Normant, car il m’ont d’enfanche
Nourri et fait mainte honnestanche,
Et se li cors ne le dessert,
Li cuers a tel cose s’aert,
Que, se Dieu plaist, meri leur iert,
Se Diex adreche m’esperanche,
Leur huis m’ont eté bien ouvert.
Cuers qui tel compaignie pert,
Doit bien plourer le dessevranche.
Bien est drois, puisque je m’en vois,
Que congie prengne as Pouchinois,
Nomméement à l’aisné frère,
C’est signeur Jakemon Ançois
Qui ne sanle mie bourgois
A se taule, mais emperere.
Je l’ai trouvé au besoing père,
Car il mut parole et matière,
C’on m’aidast au partir d’Artois.
Or pren cuer en le gent avere,
J’ai esté vers au primes père,
Dou fruit n’aront fors li courtois.
Sires Pierres Pouchins, biaus sire,
Je ne doi mie estre sans ire,
Quant de vous partir me convient :
Tant m’avés fait, Diex le vous mire,
C’au départir mes cuers souspire
Toutes les fois qu’il m’en souvient.
La Vile est bien alée a nient,
De coi cités bone devient,
Par vo venue, bien l’os dire,
Plus que pour hom qui s’i tient.
Pour avoir chascun qui là vient
Faites vo serjant estre au Pire.
Puis c’aler doi hors de men lieu
Haniel Robert Nasart, adieu,
Giles li père Jehans Joie,
Au jouster n’estes mie eskieu,
De bos avés fait maint alieu,
Et maint biau drap d’or et de soie,
Mis en feste : las, or est coie
Le bone vile ou je véoie
Chascun d’onneur faire taskieu.
Encor me sanle il que je voie
Que li airs arde et reflamboie
De vos festes et de vo gieu.
Bien doi parler entre les bons
De Colart Nasart qui est joins,
Bons et nés, courtois et gentiex
Seur tous jones, grasce li doins,
Encor ne li soit il besoins :
Car s’il estoit à plus deschiex,
Si sanle il estre d’un roy fiex,
Et vient si bien qu’il ne peut miex,
Pour estre de valeur au loins
Emploiier son tans li doinst Diex
Si bien qu’il en soit prisies viex,
Du jour est li vespre tesmoins.
A tous ceus d’Arras en le fin
Pren congié pour che que mains fin
Ne me cuident de cuer vers eux ;
Mais il i a maint faux devin
Qui ont parlé de men couvin,
Dont je ferai chascun hontex ;
Car je ne serai mie tex
Qu’il m’ont jugié a leur osteux,
Quant il parloient apres vin,
Ains cueillerai cuer despiteus,
Et serai fors et vertueus,
Et drois, quant il gerront souvin.
Chi fine li congiés Adan.