Cent Ballades (Christine de Pisan)/Ballade XXXVIII

Christine de Pisan

Puis que le terme est passé

Cent Ballades, Texte établi par Maurice Roy, Firmin Didot, 1886 (p. 39).

XXXVIII

Helas ! doulz loyaulx amis,
En grant desir attendoie
Le terme que m’aviez mis
4 De retourner, mais ma joye
Tourne en dueil : tout est cassé
Le bon espoir que j’avoye,
7 Puis que le terme est passé.

Vous m’aviez dit et promis,
Et aussi je l’esperoie,^[1]
Que deux moys ou trois demis,
11 Demourriez en ceste voye,
Dont je me doubt que lassé
Vous soyez que plus vous voye,^[2]
14 Puis que le terme est passé.

Or est de tous poins desmis
Le soulas qu’avoir soloie,
En pensant que ja remis,
18 Du retour fussiez en voye
De venir ; mais effacé
Est mon bien ; car trop m’anoie,
21 Puis que le terme est passé.

1. B ainsi
2. B omet le second vous