Cent Ballades (Christine de Pisan)/Ballade XXI

Christine de Pisan

Qu’a peine le puis escondire

Cent Ballades, Texte établi par Maurice Roy, Firmin Didot, 1886 (p. 22).

XXI

Tant me prie trés doulcement
Cellui qui moult bien le scet faire,
Tant a plaisant contenement,
4Tant a beau corps et doulz viaire,
Tant est courtois et debonaire,
Tant de grans biens oy de lui dire^[1]
7Qu’a peine le puis escondire.

Il me dit si courtoisement,
En grant doubtance de meffaire,
Comment il m’aime loyaument,
11Et de dire ne se peut taire,
Que neant seroit du retraire ;
Et puis si doulcement souspire
14Qu’a peine le puis escondire.

Si suis en moult grant pensement^[2]
Que je feray de cest affaire ;
Car son plaisant gouvernement,
18Vueille ou non, Amours me fait plaire,
Et si ne le vueil mie attraire ;
Mais mon cuer vers lui si fort tire
21Qu’a peine le puis escondire.

1. B T. oy de l. de g. b. d.
2. B Si s. en trop g.