Cent Ballades (Christine de Pisan)/Ballade XLIV

Christine de Pisan

Je m’en sçay bien a quoy tenir

Cent Ballades, Texte établi par Maurice Roy, Firmin Didot, 1886 (p. 45).

XLIV

Amours, il est fol qui te croit,
Ne qui a toy servir s’amuse ;
Car qui mieulx te sert plus reçoit
De grans anuis, et sa vie use
A grant meschief qui s’i esluse ;
Grant faissel lui fault soutenir,
Je m’en sçay bien a quoy tenir.

Ton bel accueil chascun deçoit,
Chascun attrait, nul ne reffuse,
Assez promet et moult accroit ;
Mais au payer trestous cabuse,^[1]
Et pis y a, car on accuse
Qui ta vie veult maintenir,
Je m’en scay bien a quoy tenir.

A la perfin chascun le voit,
Ton fait n’est fors que droitte ruse.
Et s’au commencier on savoit
Comment la fin on est confuse,
Tel s’en retrairoit qui y muse ;
Mais on ne s’i scet contenir,
Je m’en sçay bien a quoy tenir.

1. Note Wikisource : voir un erratum en p. 319.