Ballades sur plusieurs sujets/Ballade XXVI
L’autre jour je fis assembler
Le plus de Conseil que povoye,
Et vins, bien au long, raconter
Comment deffié me tenoye
Comme par I ectres monstreroye
De Merancolie et Douleur ;
Pourquoy conseiller me vouloye
Par les Trois Estas de mon cueur.
Mon advocat prist à parler,
Ainsi qu’anformé je l’avoye ;
Lors veissiez mes amis pleurer,
Quant sceurent le point où j’estoye ;
Non pourtant, je les confortoye,
Qu’à l’aide de nostre Seigneur,
Bon remède je trouveroye
Par les Trois Estas de mon cueur,
Espoir, Confort, Loyal Penser,
Que mes chiefs conseillers nommoye,
Se firent fors, sans point doubler,
Se par eulx je me gouvernoye.
De me trouver chemin et voye
D’avoir brief secours de Doulceur,
Avecques l’aide que j’auroye
Par les Trois Estas de mon cueur.
Prince, Fortune me guerroyé
Souvent à tort et par rigueur,
Raison veult que je me pourvoye
Par les Trois Estas de mon cueur.