Ballades sur plusieurs sujets/Ballade XX
Beau frère, je vous remercie,
Car aidié m’avez grandement ;
Et oultre plus, vous certiffie
Que j’ay mon fait entierement ;
Il ne me fault plus riens qu’argent
Pour avancer tost mon passage,
Et pour en avoir prestement
Mettroye corps et ame en gage.
Il n’a marchant en Lombardie,
S’il m’en prestoit presentement,
Que ne fusse, toute ma vie.
Du cueur à son commandement.
Et tant que l’eusse fait content
Demourer vouldroye en servage,
Sans espargner aucunement,
Mettroye corps et ame en gage.
Car se je suis en ma partie,
Et oultre la mer franchement,
Dieu mercy, point ne me soussie
Que n’aye des biens largement.
Et desserviray loyaument
À ceulx qui m’ont, de bon courage,
Aidié ; sans faillir nullement,
Mettroye corps et ame en gage.
Qui m’ostera de ce tourment.
Il m’achetera plainement,
À tousjoursmès, à heritage,
Tout sien seray sans changement,
Mettroye corps et ame en gage.