Ballades sur plusieurs sujets/Ballade XIII
S’il en estait à mon vouloir.
Mon maistre et amy sans changier,
Je vous asseure, pour tout voir,
Qu’en vo fait n’auroit nul dangier ;
Mais par deçà, sans attargier,
Vous verroye hors de prison,
Quitte dutout, pour abregier.
En ceste presente saison.
Se tel don povez recevoir
Par la grace Dieu, de legier
Pourrez tel à paix esmouvoir.
Qui la desire eslongier ;
Nul contre n’osera songier,
Car confort aurés bel et bon.
Se Dieu nous veult assoulagter.
En ceste presente saison.
Mettons nous en nostre devoir
Qu’en paix nous puissions herbergier ;
Il n’est ou monde tel manoir.
Qui desir a de si logier.
Abregeons, sans plus prolongier,
Il en est temps, ou jamais non,
Pour nous de guerre deslogier,
En ceste presente saison.
Or pensons de vous allegier
De prison, pour tout engagier,
Se n’avons paix et union,
Et du tout m’y vueil obligier,
En ceste presente saison.