Ballades sur plusieurs sujets/Ballade VII
Nouvelles ont couru en France,
Par mains lieux, que j’estoye mort ;
Dont avoient peu deplaisance
Aucuns qui me hayent à tort ;
Autres en ont eu desconfort.
Qui m’ayment de loyal vouloir.
Comme mes bons et vrais amis.
Si fais à toutes gens savoir
Qu’encore est vive la souris.
Je n’ay eu ne mal ne grevance,
Dieu mercy, mais suis sain et fort,
Et passe temps en espérance
Que paix, qui trop longuement dort,
S’esveillera, et par accort
À tous fera liesse avoir.
Pource, de Dieu soient maudis
Ceux qui sont dolens de véoir
Qu’encore est vive la souris.
Jeunesse sur moy a puissance,
Mais Vieillesse fait son effort
De m’avoir en sa gouvernance.
À présent faillira son sort.
Je suis assez loing de son port,
De pleurer vueil garder mon hoir ;
Loué soit Dieu de Paradis,
Qui m’a donné force et povoir ;
Qu’encore est vive la souris.
Nul ne porte pour moy le noir,
On vent meilleur marchié drap gris ;
Or tiengne chascun, pour tout voir,
Qu’encore est vive la souris.