Ballades (Charles d’Orléans)/Ballade I

Poésies complètes, Texte établi par Charles d’HéricaultErnest Flammarion (p. 113).
Ballade II  ►


BALLADES

____________

BALLADE l.

     Mon cueur m’a fait commandement
De venir vers vostre jeunesse,
Belle que j’ayme loyaument,
Comme doy faire ma Princesse.
Se vous demandés pour quoy esse ?
C’est pour savoir quant vous plaira
Alegier sa dure destresse.
Ma Dame, le sauray je jà ?
     Dittess le, par vostre serment ;
Je vous fais léale promesse
Nul ne le saura, seulement
Fors que lui, pour avoir léesse ;
Or lui monstrés qu’estes maistresse,
Et lui mandez qu’il guérira ;
Ou s’il doit morir de destresse,
Ma Dame, le sauray je jà ?
     Penser ne pourroit nullement
Que la douleur qui tant le blesse
Ne vous desplaise aucunement ;
Or faittes donc tant qu’elle cesse,
Et le remettés en l’adresse
D’Espoir, dont il party pieçà ;
Respondez sans que plus vous presse,
Ma Dame, le sauray je jà ?