| ◄ Laisse XXXIII | Laisse XXXIV | Laisse XXXV ► |
Partiz est da sa fame le rois enperial.
Maintinant desandi dou paleis princepal ;
A place l’atendoient ses barons natural.
Le roi seigne son vis et monta el ceval.
De son neveu Rollant a feit son mareschal.
Le jor seoit li quens el noir de Portegal,
Armez de totes armes qe se feit a vasal.
Son hiaume et son escus et son espliez pugnal
Par derier li porte son escuers loial.
En mans tient un bastons a loi de senescal,
E insir feit de Paris les barons por engal.
Si ordineement s’en estrent le jornal
Com deüsent trover lor anemi mortal ;
Sonent grailles et timbres et font grant batistal.
Le jor furent de dames garniz maint fenestral
Port remirer les host a l’ensir del portal.
Vers Espaigne baloient les confenons real.
Les dames, les pulcelles en ferent duel coral :
Humeis oblïeront lor tresches et lor bal ;
Des or proieront Dés, le roi celestial,
Qe lor gart lor mari et remant sains et sal.