◄ Laisse XXXIX | Laisse XL | Laisse XLI ► |
Si com a Feragu sa parole finie,
Armer s’en vont tote la baronie.
Dedanz la ville remest la jeldonie ;
Tant en i avoit, ni est que le nonbre en die.
Feragu s’arme en la sale voutie.
N’oit plus biax home en tote Paienie,
Ne mielz cortois ni plus sans villanie.
Largeçe fu por lui mantenue e sanplie,
Avarice destruite e de son cor bandie ;
Jameis de son nemi non dist outrequidie,
Mais envers tote gient grant bien e cortesie ;
E quant les oit devant a bataille rengie,
Vers aus non oit amor ne nulle compaignie.
Jameis ne sofri tort an trestote sa vie ;
Por orfres e por veves, por gient a tort blesmie.
Sajes fu ens escriz de la Mahomarie ;
Rices fu a mervoille et pobre mante fie ;
Vint anz avoit a point, l’estorie le nos crie ;
.xii. coubes fu long, ce est voir sans boisdie ;
La ganbe oit longe e grosse, la forqueüre lie ;
Anples fu en espales ; bu ne li desdist mie ;
Le braz oit long e gros, la mans blance e pollie,
Le doi long de troi paumes, cil q’a plus seignorie ;
Entre l’uns oilz et l’autre une paume et dimie ;
Ceveleüre blonde et longe e trecelie ;
Gros fu e colloriez, n’a nulle or n’en rie ;
Gracios a tot homes. Ne sai qe plus vos die :
Se pur deignast acroire el filz sante Marie,
Au segle n’eüst pier de tote baronie.