◄ Laisse LVI | Laisse LVII | Laisse LVIII ► |
Quant le duc Berenger voit la desconvenue,
Qe son frere en menent cele gient mescreüe,
Avant qe la novelle soit por Carlons seüe,
Avra il, se il puet, cele prise vendue.
Le destrer leit aler qe mout tost se remue ;
Par tiel vertu estraint sa bone lance ague
Par pué ne l’a le beir e fraite e derumpue.
Quant Feragu le voit, a sa gient breit e hue.
« Arestez vos », dist il, « en cele lande erbue ;
« Si je ne vos reclam, ne soit brace meüe ;
« Veroiz a plainté prendre de ceste gient perdue. »
Plus tost n’out le Paiens sa parole tehue
Qe Berenger li fiert en la targe bosue ;
L’aste de son esplié li a en troi leu rompue.
Feragu streint le pung, fieremant se vertue,
Teil colp i a donez tres par mie la vehue
Qe pasmez et stordiz l’abat sor la menue ;
Paiens lui ont son hiaume e sa spee tollue ;
Ne lui laserent riens trosqe en la cars nue ;
Pris l’en menent batant vers la citez cremue.
Pres son frere fu mis dedenz la tor fundue ;
Malemant lor estoit, s’ancué n’avront aiue.