| ◄ Laisse DL | Laisse DLI | Laisse DLII ► |
Dist la puncelle a le clere fayzon :
« Glorios Dei, qui mers, teres et mon
« Trestot faisistes par voustre devision
« El primers home de terre et de limon
« Qu’enjendra fils de male nacyon,
« Anc ja le meudre non fist jor se mals non ;
« Cil vos servoit d’aigneaus et de mouton
« Que il ardoit en feus et in charbon,
« Son frers l’uncist, que Chaïns hot a non ;
« Ce fist il tot par vostre vengeson,
« Mais nel voulent croir li Jüef fellon :
« Une lor lois tinent d’enchantaison
« Que Moïsés, un enchresmés glouton,
« Vit en dormant par une avision,
« Char un Diables de l’infernal prison
« En forme d’angle i aporta le baston
« De quoi faisoit sun talant et sun bon ;
« Sir, ce soufristes une longe saisson
« Tant qu’il nasqui don lignaz Salemon
« Le voir proufete que on apelloit Jeson,
« Fils a une dame de grant devouzion :
« Celui moustra droite et vive raisson
« Que cele lois non valloit un bouton
« E fist miracles, char de fi le soit hon ;
« Les faus Jüeif le pristrent en traisson,
« Pué le penderent en crois come laron :
« Vos en faisistes pué vengance a bandon,
« Vespesians en fu voustres chanppion
« Que de Jüeis fist tiels destruzion.
« Depué ce, Sire, invouyastes Machon :
« Aprés Yesus fu in segunde eslizion ;
« Cil non perloit se par Saint Esprit non ;
« Cil que lui croit avroit sauvazion,
« Car au novisme jornal que atendon
« Mahomet et Jesus nos justisiers seron :
« Cescuns sa lois i metroit par rayson.
« Cil que vers eus avront fait mesprison
« Serunt danez en l’ouschure maison ;
« Mais nuls Juïf jamais n’avra perdon,
« Car lor creance lor est destruzion.
« Les Cristians et les Saracins bon
« En Paraïs avec eus s’an iron.
« Aprés le Rois de gloire, in Aquilon,
« Sor une seize seiroit Jessus el tron
« A la main destre, et de l’autre, Machon.
« Si cun c’est voir, sir Dex, faites moi don
« Que voustre ahie et voustre reancon
« Mandés celui qu’est par moi in tenzon
« Qu’il non l’uncie cil incresmé Noiron :
« De lui seroit pechié, que de moy non,
« Chant il morist par si foible oqueison
« Come la moie ; mais non soit celui pon. »
Lor soi leva, plorant des oil dou fron ;
Au pere torne, qui est in grant frichon,
Car molt soi doute de le mort au baron.