◄ Laisse DCXLV | Laisse DCXLVI | Laisse DCXLVII ► |
Sanson, le fil Soldan, prent la pome en riant ;
Tost q’il en oit gosté, si dit : « Bien m’acontant
« Ke ja plus noble çose non vit home vivant :
« Bien vaut un tiel pomer tot le regne Persant. »
Il en paruit goster, mais il n’en fist neant.
Quant furent saülés li dui a lor talant,
« Segnor » ce dit li angle, « dormés seguremant,
« E je farai la garde, e an mie nuet avant
« Leverés a garder trosqu’en l’aube parant. »
E il li respondirent : « Tot a vestre comant. »
As chevaus donent boire la dous aigue corant,
Pués s’achocha cescun sor sun escu pesant.
Le angle les signa por un tel covenant
Ja ne reveileront jusqu’a solel luçant.
Or dirons de l’ermite qi s’en veit eremant ;
Por devant l’autel Deu en gienoilon se stant
E proie Nostre Sir de foi e scordemant
Que humés le recoge en le regne contant :
De jor en jor aloit tel proiere faisant.
Lor voit environ lui un esplendor si grant
Que cil qi les airs fent non seroit autremant,
Qi por paor de foldre feit signer maintenant.