| ◄ Laisse DCXIII | Laisse DCXIV | Laisse DCXV ► |
La tormente fu grant e mout feit a douter.
Se ne lor fust creüs cil si fer destorber
Au port de Nice fusent avant .vi. jor enter ;
Mais li mauvés orajes les en fist si eslogner
(Ce nos conte l’istorie), qe nus non puet finer,
Qu’il passent Barbarie e maint isles de mer ;
Entre Spagne e Moroch, qant les airs furent cler,
S’est la nef atrovee e l’estormant Brecer.
« Segnor, ne vos doutés », ce a dit le nocler.
« Veés les bois d’Espagne, li mons e li rocher ;
« Nos avomes coru a plen .vi. jor enter,
« Entre Spagne e Moroch somes venus najer.
« Jamais ne vi torment tan longement durer,
« Mais je m’an savrai bien ariere reperer
« E sans e saus vos croi en Provance guïer.
— Amis », ce dit Rolant, « or m’acovient parler :
« Un pué sui saolés d’oubeïr mariner.
« De ce qe m’ais servis de fi ci an arer,
« Je t’an merci, tout ce qe n’avras bon loer.
« Mais se tu me veus bien de tot acontenter,
« Con tu plu tost te puisses a la tere ajoster,
« Je t’an pri e conjur por l’arme de ton per,
« Se tu me mets a terre e moi e mon destrer,
« Je te lés tot l’arnois e l’argiant e l’or mer
« Qui sont en nostre nef, se Diex me puist eider.