◄ Laisse DCL | Laisse DCLI | Laisse DCLII ► |
DCLI[1]
Aprés le pan, dou pome a menjüé le dus :
Tant dous et saborous en a sentis le jus
Que pimant ni claré ni ceriz ni vins nus
Non delita a avoir, s’il en fust manteüs,
Que le sabor ne sente con s’en aüst beüs.
Quant ont menjüé tant qe il non voudrent plus,
Si levent en estant et a Deu font salus.
Le hermite prent dou pan qi li est remansus,
Pué a dit a Rolant : « Esgarde, de Deu drus :
« Que tu me doneras ains qe jor soit venus.
« Quant m’avrai confessié et cist pan reçeüs,
« Ceste vie teraine e cist monde refus :
« Devant toi me verais geisir mort estendus :
« Ce m’a feit a savoir la divine Vertus.
« E tu soies prodome, se tu onqes mas fus,
« Por esaucer la loi de Cil qi fu pendus
« En servixe de nos e por nostre salus.