◄ Laisse CXXXIX | Laisse CXL | Laisse CXLI ► |
Anc ne fu nulle q’eüst tante duree.
Püez savoir mout i ot grant aïree
Quant la bataile fu a pieres tornee ;
Ensi dura trosque none passee.
Il n’i a targe qe ne soit estroee,
O en .vii. leu o en .vi. pertusee.
Le niés Marsille fu de grant alenee,
Neporquant fu en icele jornee
Si estanchee sa cars et afinee
Tot le gambaus e la bronie safree
E sa camise a de desoz moillee.
Des colp Rollant avoit sa cars frapee ;
Ele n’estoit sanglant ni detrenchee,
Mais autremant fu mout mal demenee.
Fiere bataille li a li duc donee,
Mout li a bien Espaigne calongee,
E il meïme, c’est verité provee,
Fu si estanché, a poine qu’il reflee.
Feragu dist al duc en escrïee :
« Est dunc ta cars, Rollant, d’acier tempree
« Quant encor n’est par bataille estanchee ? »
Respont Rollant : « Grant folie ais pensee.
« Crois estancher la divine ponnee ?
« Par li a jé ceste ovre encomencee. »
Dist Feragu : « Done moi, s’il t’agree,
« Un pué de treugue, qe mout l’ai desiree. »
Le duc respont : « Ja ne vos ert vehee.
« Repoisé vos en tiele destinee
« Che Diex vos dunt grace avant la vespree
« De pervenir a la loi batiçee,
« O voirement a ceste moie spee
« Vos soit enchué l’arme dou cors sevree. »
Le Turc s’an rit, s’a la teste corlee.