| ◄ Laisse CXII | Laisse CXIII | Laisse CXIV ► |
Par Diex, seignor qe oiez la cançon,
Ne vos soit greu a oïr por raison
L’aspre bataille dou duc a l’Esclavon,
Che voiremant, se mentir ne devon,
De dos sols homes, voilez li croir o non,
N’oit tiel bataille ne tan longe tençon.
Se longe fu l’euvre des dos barons,
En breu sentance dir ne la vos puet hon ;
Anz s’aconvient canter l’aflicion
Ch’a plain troi jors dura le niés Carlon
Vers Feragu, por esmater Machon
E par acroistre la loi que nos creon.
Se dam Trepin fist bref sa lecion
E je di long, blasmer ne me doit hon ;
Ce que il trova, bien le vos canteron.
Bien dirai plus, a chi’n pois e chi non,
Car dous bons clerges, Çan Gras et Gauteron,
Çan de Navaire e Gauter d’Aragon,
Ces dos prodomes ceschuns saist pont a pon
Si come Carles o la fiere façon
Entra en Espaigne conquere le roion,
La començaile trosque la finisun
Dejusque ou point de l’euvre Guenelon.
D’ilueç avant ne firent mencion,
Car bien conta Trepin la traïson
Que Guenes fist, li encresmé felon,
Com il vendi o roi Marsilion
En Roncival Rollant e se baron.
Ces troi otor che nomé vos avon
Se sunt trovez de voir dir compagnon,
Mais cil Gauter dist plus de nus autre on.
Chi donque veult intandre par raison,
Vienent avant, car je lor dirai com
Li ber Rollant, le filz al duc Milon,
Feragu oncist, que tant estoit prodon ;
E les batailes che par cronice son
En vers François, n’i a mot Bergognon,
Vos dirai totes par bone intencion.