◄ Laisse CLXXIX | Laisse CLXXX | Laisse CLXXXI ► |
En tiel mainere cum je vos ai conté
Furent François as Paiens acordé.
Entre quens Hue e Riçard e Galé
Lor ont devant troi confanons porté.
Li primerans porte li duc Gallé
A une gran crois d’un arçant esmeré :
Cil san signal doit bien estre honoré
Por le niés Karles, mantenu e esaucé,
Car por lui est en tant honor monté
Dond il ert sempre vis e mort remembré.
Rollant le voit, si est engenoilé ;
Prand les a mains, si les a présenté
As mesajers Paiens de la cité.
Li duc Riçard lor a desvelupé
Un confanon dont li camp est dauré,
Li saint oisel li estoit coroné :
Cil doit bien estre por reixon redoté
Da ceschun tort e nemi de bonté
E por les bons porté et esaucé.
Ugue dal Mans aprés li a livré
Li confanons dond Milon fu adobé,
D’or e d’açur partis e squartelé.
Le mesajers cum grant solepnité
Pristrent dau roys e das barons congé ;
Arier s’en vont le droit chemin feré.