◄ Laisse CCLXXXVIII | Laisse CCLXXXIX | Laisse CCXC ► |
Quant cist afaire oit devisé le rois,
Rolant apelle : « Bel niés, or me ferois
« Tot ce banir quant de ci partirois.
— Volenter, sire, ne vos en doterois. »
Le consil part, che ne fu pas secrois,
Anç fu crïeç e baniç demanois
Cil che devront demain trencer li bois ;
Ribaus, serjant, tavernier e borçois
Ferunt les foses, ja n’i avrunt repois.
Ne li fu gent che lor clamast sordois,
For solemant les montanier Tiois
Chi vunt par l’ost disant a dos e a trois :
« Cist roi entant de fraper nos le dois ?
« Chi nos comande, por feir de nos gabois,
« Mai, par saint Per, il oit treit a falois.
« Alons estorser es mailes nos ernois,
« Si s’en irons ver nos païs tot drois
« A çeste nuit, quant dormiront, secrois.
« Jesus confunde, li Pere gloriois,
« Chi serviroit dan Çarles d’un Tornois. »