Amour tu semble au phalange qui point
Amour tu semble au phalange qui point,
Luy de sa queue, et toy de ta quadrelle,
De tous deux est la pointure mortelle,
Qui rempe au cœur, et si n’aparoist point.
Sans souffrir mal tu me conduis au point
De la mort dure, et si ne voy par quelle
Playe je meurs, ny comme ta cruelle
Poison autour de mon ame se joint.
Cex qui se font saigner le pié dans l’eau,
Meurent sans mal, pour un crime nouveau
Fait à leur Roy, par traitreuse cautelle.
Je meurs comme eux, voire et si je n’ay fait
Encontre amour, ny traïson ny forfait,
Si trop aimer un crime ne s’appelle.
MURET [ ? lire BELLE AU]
Amour tu semble.) Il dit qu’Amour resemble aux Pha
langes, lesquelles blessent les hommes sans que la playe
apparoisse. Phalanges.) Phalanges vient de ce mot
Phalanx, qui signifie troupe, pource qu’ils vont par
bandes et par troupes, ce sont petites bestes infectes
qui picquent les hommes à la mort, et si la blessure n’est
manifeste nullement. Nicandre en ses Theriaques en
descrit de neuf ou dix sortes. Quadrelle.) Quadrelle est un
pur mot Italien non encor cognu entre les François,
qui signifie fleche.