Ronsard - Œuvres, Buon, 1587/Madame ne donne
A Dame ne donne pas
Des baiſers, mais des appas
Qui ſeuls nourriſſent mon ame,
Les biens dont les Dieux ſont fous,
Du Nectar du ſucre dous,
De la cannelle & du bâme,
Du thym du lis de la roſe
Entre ſes léures eſcloſe
Fleurante en toutes ſaiſons :
Et du miel tel qu’en Hymette
La deſrobe-fleur auette
Remplit ſes douces maiſons.
O Dieux, que i’ay de plaiſir
Quand ie ſens mon col ſaiſir
De ſes bras en mainte ſorte !
Sur moy ſe laiſſant courber,
D’yeux clos ie la voy tomber
Sur mon ſein à demi-morte !
Puis mettant la bouche ſienne
Tout à plat deſſus la mienne,
Me mord & ie la remors :
Ie luy darde, elle me darde
Sa languette fretillarde,
Puis en ſes bras ie m’endors.
D’vn baiſer mignard & long
Me reſſuce l’ame adonc,
Puis en ſouflant la repouſſe,
La reſſuce encore vn coup,
La reſſoufle tout à coup
Auec ſon haleine douce.
Tout ainſi les colombelles
Tremouſſant vn peu les ailes
Hauement ſe vont baiſant,
Apres que l’oiſeuſe glace
A quitté la froide place
Au Printemps doux & plaiſant.
Helas ! mais tempere vn peu
Les biens dont ie ſuis repeu,
Tempere vn peu ma lieſſe :
Tu me ferois immortel.
Hé, ie ne veux eſtre tel,
Si tu n’es außi Déeſſe.