Recueil général et complet des fabliaux des 13e et 14e siècles/LXVI
LXVI
DU FAUCON LANIER
fol. 256 ro.[1]
u biau faucon lanier mauvès
Resamble maint homme de fès,
Si vous en dirai la reson :
Quant les perdris sont en seson
Et on le gete por voler,
Sachiez que il ne veut aler :
A la terre s’assiet tantost
Jusqu’atant qu’il trueve qui l’ost,
Son mengier veut avoir por nient
Par la mauvestié qui le tient,
Et volast bien se il vousist,
Mès onques tant de bien ne fist
Qu’il ne face ore le contre re,
Si que l’en a de lui que fere.
Ausinques est il d’aucun hom
Qui mestier set et bel et bon
Por gaaignier se il vousist,
Mès mauvestié si le saisist
Dont il ne se veut remuer
Qu’il li estuet trestout trover
Et a vestir et à chaucier,
Et honis soit le sien mestier,
Quar il iroit par le sien pris
De toz biens et nus et despris,
Et quant il est desatiriez
Et d’aucune cbose arririez,
Si dist : « Se j’estoie à barnas
Et je eusse uns linges dras »
Ou tel chose que il n’a mie,
« Foi que je doi sainte Marie
Encor iroie gaaingnier
Et seroie hors de dangier. »
Et quant on l’a remis arriere
Ou point et à droite maniere
Pour gaaignier aucune chose.
Tant fet qu’il est à la desclose,
Et quant ert cel gaaing veü,
Quant erent trestuit revenu
Li deable de rasteler,
Tel gent ne doit on pas amer,
Ainz le doit on mout desprisier
Qu’il resamble de son mestier
Au faucon lanier, ce m’est vis,
Qui par sa perece est honis.
- ↑ LXVI. — Du Faucon lanier, p. 86.
Cette pièce, inédite jusqu’ici, nous donne le sens primitif du mot lanier, tout d’abord appliqué seulement aux faucons.