Les oeuvres poétiques de Clovis Hesteau de Nuysement 1578/Du Soleil radieux
XXX.
Du Soleil radieux, la brillante splendeur,
Et de la Lune aussi la lumineuse face,
Par un nuage espais, espars en l’air, s’efface :
Lors qu’ils vont tournoyant la celeste rondeur.
L’hyver ravit aux fleurs la couleur & l’odeur,
Et en moins d’une nuict les flestrit & terrace :
Le fruict trop avancé se passe en peu d’espace,
Et bref tout est fauché par le temps moissonneur.
Telie, voy ces lys, ces œilets & ces roses,
Languir à chef baissé desquelles sont descloses :
Qui t’esmeuvent d’avoir de toy-mesme pitié.
Cueillons donques les fleurs de ta verde jeunesse,
Et folle n’atten pas que la blanche vieillesse,
Te prive de sentir les fruicts d’une amitié.