Les oeuvres poétiques de Clovis Hesteau de Nuysement 1578/D'une incroyable amour
XI.
D'une incroyable amour, d'un desir, d'une crainte,
La chaleur, l'esguillon, & la morne froideur,
A languir, s'esgarer, & geler en l'ardeur,
Sourde, aveugle, & muette, ont mon ame contrainte.
Je n'ose descouvrir mon affection sainte,
Bruslé, point, & glacé, je couve mon mal-heur,
Et taschant d'amoindrir l'effort de ma douelur,
Je deçoy ma raison par une fable feinte.
Helas mon cher Soleil, cognois donc mon esmoy,
Mon desir, & ma peur, prenant pitié de moy,
Comme d'un criminel, qui gesné par le cable
Sent l'angoisseux tourment, & ne s'ose escrier :
Car je suis à la chaisne, & ne t'ose prier,
Toy qui peux seule oster la douleur qui m'acable.