Thresor de la langue françoise/Saure
Saure, & par apocope Saur, qui est prononcé Sore est couleur de flame de feu brune ainsi on dit vn cheual estre de couleur ou de poil Saure, duquel le manteau est de couleur viue tirant à celle du feu, l'italien dit Sauro, & le rend en Espagnol par Alesan, comme auβi Saure est appelé le cheual qui est de laditte couleur, le hareng est auβi appelé Saur, & selon la prononciation Françoise, Sor, qui a prins couleur de feu ax roussable, qui est vne forme de hale close appropriée à faire saurir & roussir le hareng, voyez Roussable, De la couleur Saure en cas de poil de cheuaux y a deux especes, Saure obscur ou bruslé, que l'Espagnol appele Alezan tostado, & l'Italien Sauro brusciato & metallino, Et saure doré, que l'Italien dit Sauro dorato, & indorato, Qui est le saure clair.
Saurir, acut. C'est faire deuenir de couleur saure, qui est dorée obscure Ainsi dit on saurir les harencs, que par apres on appelle saurs & sors, ce qui se fait les estendant sur des clayes en vne hale close appelée Roussable & leur donnant le feu & fumée de feueilles seiches d'arbres d'orme ou de chesne, ou bien du tan, lesquels feu & fumée leur donnent telle couleur, Haleces flammeo colore reddere, inficere.