Thresor de la langue françoise/Chaperon
Chaperon, m. acut. C’est vne facon d’habillement de teste, que les Fraçois de toutes qualitez portoient, qui estoit façonné communéement de drap, & celuy des Princes couuert d’orfauerie, ou autre diaprerie, estant façonné à vne manche longue & estroitte, qui faisoit plusieurs tours au col, & vn bourrelet qui estoit son assiete & arrest sur la teste de l’homme, & d’vne piece de drap plissé, qui pendoit sur l’oreille, & seruoit contre le Soleil, & le vent, ores pendant sur vne oreille, ores sur l’autre. Nicole Gilles en la vie du Roy Iean, prisonnier en Angleterre, parlant du Duc de Normandie, fils aisné de France. Lors luy bailla ledit preuost des marchans de Paris son chaperon qui estoit mi-party de rouge & de pers, à la liurée de ceux de la ville, lequel le Duc meit en sa teste, & ledit preuost print le chaperon de mondit Seigneur le Duc, qui estoit de brunette noire, orfauerisé d’or, & le porta tout le long du iour en sa teste.
Maintenant les seuls qui sont de robbe longue, & aucuns magistrats politiques en vsent, le portans sur l’espaule, là où anciennement tous François le portoient indifferemment, iusques aux messagers, & pelerins, qu’on appeloit lors aussi bourrelet, comme s’appele encores à present. D’vn tel accoustrement de teste François entend parler Villon en ces vers :
Chausses, pourpoincts, & bourrelets,
Robes & toutes vos drapilles,
Ains que cessez vous porteres
Tout aux tauernes, & aux filles.
¶ On appelle aussi chaperon l’atour & habillement de teste des femmes de France, que les damoiselles portent de velours, à queue pendant, touret leué & oreillettes attournées de dorures, & sans dorures, autrement appelé coquille, & les bourgeoises de drap, toute la cornette quarrée, horsmis les nourrices des enfans du Roy, lesquelles le portent de velours, à ladite façon bourgeoise. On dit aussi vn chapperon de Fou, pour l’habillement de teste à cornes & oreilles qu’on fait porter aux fols. : Et vn chapperon en fauconnerie, est la coiffe de cuir, où on enclost la teste du faucon.
Chaperon de femme, Caliendrum. Eras.
Chaperon, ou vne cappe que les femmes portent par le temps de pluye, Capitium.
Chaperon à femmes bourgeoises, Capitiatæ mulieres. Bud.
Chaperon de velours, Mitra matronalis. B,
Femme qui porte l’atour, Mitrophoræ mulieres. Budæus.
Chaperon fourré, Humerale pelliculatum, Insigne humerale.
Estre trois testes en vn chaperon, Coire in Geryonem.
Chaperonner aucun, Caput alicui frequenter aperire, vel adaperire, voyez Desfuler.