Thresor de la langue françoise/Assassin
(2, p. 49).
Assassin, & Assassinateur, m. acut. Adiectif, est dit celuy qui de guet à pens, & par machination conspirée met en sur-saut & d’emblée à mort vn autre, estant loué & attitré à cest effect. Le mot est prins de l’Italien (ainsi n’en puisse oncques le François prendre l’vsage) qui le peut auoir tiré de ce mot vltra-marin Arsacides. L’Espagnol d’vn nom propre à sa nation le nomme, Saltrador de passo. Percussor. Cic. pro Roscio Amer. Liu. lib. 3. bell. Macedon. Percussor emptitius.
Assassinat, & Assassinement, m. acut. Est le forfait executé par l’Assassin, Grassatio, Sicariatus. Il s’entend aussi pour l’excez fait de guet, àpens & d’emblée, ores que l’assassiné ne soit tué, Homicidium mercenarium, vel emptum.