Page:Chrétien de Troyes - Roman de Perceval le Gallois - MS 248.pdf/4

Qui dit ne saiche ta senestre
Le bien quant le fera ta destre
Cil le sache qui le recoit
Et cil qui toz les segrez voit
Et set totes les repostailles
qui sont es cuers et es antrailles
L Evangile porquoi dit ele
Les biens a ta senestre cele
La senestre selonc lestoire
Senefie la vaine gloire
Qui vint de fause ypocrisie
Et la destre que senefie
Charité qui de sa bone veure
Pas ne se vante ancois la cveure
Que nus ne le set se cil non
Qui deus et charitez a non
Car dex est charitez et qui uit
En charité selonc lescrit
？ seint pol le ui et lui
Il maint en deu et deus en lui
Donc sachez bien de verite
Que li don fut de charite
Que li buens cuens felipe done
Et quons nelui nen araisone
Fors son franc cuer le debonaire
Qui li loe le bien a faire
Ne ualt mielz cil que ne valut
Alixandre qui ne chalut
De charite ne de nul bien
Oil nen dotez ia de rien