Page:Abundance - La Guerre et le débat entre la langue, les membres et le ventre.djvu/29

Et luy monſtrons quil enners noꝰ tort
Il eſt licite de repeller le fort
Par force car la raiſon ſi le dit
Pource doncques eſcoutez mon edict.
¶De malz fouldre de tempeſte et doraige
De feu gregoys de chault mal/et de rahe
De fieure quarte pour ſon dos aguiſer
De quaque ſangue/et pêrir en naufrage
De iamais neſtre paiſible en mariage
De tous les maulx quon pourroit aduiſer
Soyent maulditz ſans nul en excuſer
Qui ſeruiront iamais ce garnement
Voire & dampnez perpetuellement.
¶Labeur ſans fin a qui ne le fuyra
Peine et tourment qui plus le ſeruira
Honteuſement mourir en douleur puiſſe
Et qui plaiſir deſormais luy fera
Touſiours douleur ait qui ne ceſſera
Au fons dung puys en foſſe ou lac periſſe
De ſon bon ſens incontinent hors yſſe
Courant les rues comme enraige ou fol
Ou dune hard ſoit pendu par le col
¶Ses mẽbres ſoyẽt rẽplys de malegoute
De trenchoyſons ou colicque ſe boute
De griefue toux paſſion de poitrine
De mal de reims ou ſoit grauelle toute
De flux de ventre qui coue goutte a goutte
Qui point ne peut guerir par medicine