S’il ne vous plaist que j’aye mieulx,
Je prendray en gré ma tristesse.
Mais, par Dieu, ma plaisant maistresse,
J’amasse plus estre joyeux !
De vous suy si fort amoureux
Que mon cuer de crier ne cesse.
S’il ne vous plaist que j’aye mieulx,
Je prendray en gré ma tristesse.
Belle, tournez vers moy vos yeulx,
Et veez en quele tristesse
J’use mon temps et ma jeunesse.
Et puis faites de moy vos jeux,
S’il ne vous plaist que j’aye mieulx.
