Les Œuvres de François Rabelais (Éditions Marty-Laveaux)/Pantagruel/30
Comment Epistemon qui avoit la coupe testée, feut guery habillement par Panurge. Et des nouvelles des diables, & de damnez.
Chapitre XXX.
este desconfite gygantale parachevée, Pantagruel se retira au lieu des flaccons, & appela Panurge & les aultres, lesquelz se rendirent à luy sains & saulves, excepté Eusthenes qu’ung des geans avoit esgratigné quelque peu au visaige, ainsi qu’il l’esgorgetoit. Et Epistemon qui ne comparoit point. Dont Pantagruel fut si dolent qu’il se voulut tuer soymesmes, mais Panurge luy dist. Dea seigneur attendez ung peu, nous le chercherons entre les mors, & verrons la verité du tout. Ainsi doncques comme ilz cherchoient, ilz le trouverent tout roidde mort & la teste entre ses bras toute sanglante.
Dont Eusthenes s’escrya. Ha male mort, nous as tu tollu le plus parfaict des hommes. À laquelle voix se leva Pantagruel au plus grand deuil qu’on veit iamais au monde. Et dist à Panurge. Ha, mon amy, l’auspice de vos deux verres & du fust de iaveline estoyt bien par trop fallace. Mais Panurge dist. Enfans, ne pleurez goutte, il est encores tout chault. Ie vous le gueriray aussi sain qu’il fut iamais. Et ce disant print la teste & la tint sus sa braguette chauldement qu’elle ne print vent, & Eusthenes & Carpalim porterent le corps au lieu où ilz avoient bancquetté : non par espoir que iamais guerist, mais affin que Pantagruel le veist. Toutesfois Panurge les reconfortoit, disant. Si ie ne le guerys ie veulx perdre la teste (qui est le gaige d’ung fol) laissez ces pleurs & me aydez. Adonc nectoya tresbien de beau vin blanc le col, & puis la teste : & y synapiza de pouldre de diamerdys qu’il portoit tousiours en une de ses fasques, apres les oignit de ie ne sçay quel oingnement, & les afusta iustement veine contre veine, nerf contre nerf, spondyle contre spondyle, affin qu’il ne feust torty colly (car telles gens il haissoit de mort) ce faict luy fist alentour quinze ou seize poincts de agueille, affin qu’elle ne tumbast de rechief : puis mist à l’entour un peu d’vn unguent, qu’il appelloit resuscitatif. Soubdain Epistemon commença à respirer, puis à ouvrir les yeulx, puis à baisler, puis à esternuer, puis feist ung gros pet de mesnage. Dont dist Panurge, à ceste heure il est guery asseurement : & luy bailla à boire d’ung grand villain vin blanc avecques tout une roustie succrée. En ceste façon fut Epistemon guery habilement, excepté qu’il fut enroué plus de troys sepmaines, et eut ung toux seiche, dont il ne peut oncques guerir, sinon à force de boire.
Et là commencza parler, disant. Qu’il avoit veu les diables, & avoit parlé à Lucifer familierement, & faict grand chere en enfer, et par les champs Elisées. Et asseuroit devant tous que les diables estoient bons compaignons. Et au regard des damnez, il dist, qu’il estoit bien marry de ce que Panurge l’avoit si tost revocqué en vie. Car ie prenoys, dist il, ung singulier passetemps à les veoir.
Comment ? dist Pantagruel. L’on ne les traicte pas, dist Epistemon, si mal que vous penseriez, mais leur estat est changé en estrange façon. Car ie veis Alexandre le grand qui repetassoit de vieilles chausses, & ainsi gaignoit sa vie.
- Xerces crioit la moustarde.
- Romue estoit saulnier.
- Numa clouatier.
- Tarquin tacquin.
- Piso paisant.
- Sylla riveran.
- Cyre estoit vachier.
- Themistocles verrier.
- Epaminondas myrallier.
- Brute & Caffie agrimenseurs.
- Demothenes vigneron.
- Ciceron atizefeu.
- Favie enfileur de patenostres.
- Artaxerces cordier.
- Eneas meusnier.
- Achilles teigneux.
- Agamenon lichecasse.
- Ulysses fauscheur.
- Nestor harpailleur.
- Darie cureur de retraictz.
- Ancus Martius gallefretier.
- Camillus gallochier.
- Marcellus esgousseur de febues.
- Drusus trinquamolle.
- Scipion Africain cryoit la lye en ung sabot.
- Asdrubal estoit lanternier.
- Hannibal cocquassier.
- Priam vendoit les vieulx drapeaulx.
- Lancelot du lac estoit escorcheur de chevaulx mors.
- Tous les chevaliers de la table ronde estoient pouvres gaignedeniers tirans la rame pour passer les rivieres de Coccytus, Phlegeton, Styx, Acheron, Lethé, quand messieurs les diables se veulent esbattre sur l'eau comme font les bastelieres de Lyon & gondoliers Venize. Mais pour chascune passade ilz n'en ont qu'une nazarde, & sus le soir quelque morceau de pain chaumeny.
- Traian estoit pescheur de Grenoilles.
- Anton lacquays.
- Commode gayetier.
- Pertinax eschalleur de noys.
- Luculle grillotier.
- Iustinian bimbelotier.
- Paris estoit pouvre loqueteux.
- Hector, estoit fripesaulse.
- Achilles boteleur de foing.
- Cambyses muletier.
- Ataxerces escumeur de potz.
- Neron estoit vielleux, & Fierabras estoit son varlet mais il luy faisoit mille maulx, et luy faisoit manger le pain bis, & boire le vin poulsé, luy mangeoit & buvoit du meilleur.
- Iulles Cesar & Pompée estoient goildronneurs de navires.
- Valentin & Orson servoient aux estuves d'enfer, & estoient racletoretz.
- Giglan & Gauvain estoient pouvres porchiers.
- Geoffroy à la grand dent estoit allumetier.
- Godeffroy de Billon dominotier.
- Iason estoit manillier.
- Dom Pietre de Castille porteur de rogatons.
- Morgant brasseur de byere.
- Huon de Bourdeaulx estoit relieur de tonneaulx.
- Pirrhus souillart de cuisine.
- Antiochus estoit ramonneur de cheminées.
- Romulus estoit rataconneur de bobelins.
- Octavien estoit ratisseur de papier.
- Nerua houssepaillier.
- Le pape Iules crieur de petitz pastez, mais il ne portoit plus sa grande & bougrifique barbe.
- Ian de Paris estoit gresseur de bottes.
- Artus de Bretaigne degresseur de bonnetz.
- Perceforest porteur de coustretz.
- Boniface pape huytiesme estoit escumeur des marmites.
- Nicolas pape tiers estoit papetier.
- Le pape Alexandre estoit preneur de ratz.
- Le pape Sixte estoit gresseur de verolle.
Comment ? dist Pantagruel, y a il des verollez de par delà ? Certes, dist Espitemon, Ie n’en veiz oncques tant, il y en a plus cent millons. Car croyez que ceulx qui n’ont eu la verolle en ce monde cy, l’ont en l’aultre.
Cor dieu, dist Panurge, ien suis doncques quitte : Car ie ay esté iusques au trou de Gylbathar, & et remply les bondes d’Hercules, & ay abatu des plus meures.
- Ogier le Dannoys estoit frobisseur de harnoys.
- Le roy Tigranes estoit recouvreur.
- Galien Restauré estoit preneur de taulpes.
- Les quatre filz Aymon estoient arracheurs de dentz.
- Le pape Calixte estoit barbier de mauioinct.
- Le pape Vrbain crocquelardon.
- Melusine estoit souillarde de cuysine.
- Matabrune lavandiere de buées.
- Cleopatra revenderesse d’oignons.
- Helene courratiere de chambrieres.
- Semyramis espouilleresse de belistres.
- Dido vendoit des mousserons.
- Panthasilée estoit cressonniere.
- Lucresse hospiraliere.
- Hortensia filandiere.
- Liuie racleresse de verdet.
En ceste façon ceulx qui avoient esté gros seigneurs en ce monde icy, gaingnoient leur pouvre meschante et paillarde vie là bas. Et au contraire les philosophes, et ceulx qui avoient esté indigens en ce monde, de par delà estoient gros seigneurs en leur tout. Ie veiz Diogenez qui se prelassoit en magnificence avec une grand robbe de pourpre, et ung sceptre : & faisoit enrager Alexandre le grand, quand il n’avoit pas bien repetassé les chausses, & le payoit en grans coups de baston. Ie veiz Epictete vestu gualentement à la françoyse, soubz vne belle ramee auecques force Damoizelles se rigolant, beuuant, dansant, faisant en tous cas grande chere, & aupres de luy force escuz au soleil. Au dessus de la treille estoint pour sa devise ces vers escriptz.
Saulter, dancer, faire les tours,
Et boyre vin blanc & vermeil :
Et ne faire rien tous les iours
Que compter escuz au soleil.
Lors quand me veit il me inuita à boire auecques luy courtoisement, ce que je feiz voluntiers, & chopinasmes theologalement. Ce pendent vint Cyre luy demander un denier en l’honneur de Mercure pour achapter un peu d’oignons pour son souper. Rien, rien, dict Epictete, ie ne donne poinct deniers. Tien, marault, voy là un escu, foys homme de bien. Cyre feut bien aise d’auoir rancontré tel butin. Mais les aultres coquins de Royx qui font là bas, comme Alexandre, Daire & aultres, le desroberent la nuyct.
Ie veiz Pathelin, thesaurier de Rhadamanthe, qui marchandoit des petitz pastez que cryoit le pape Iules, & luy demanda combien la douzaine ? troys blancs, dit le pape. Mais dist Pathelin, trois coups de barre, baille icy villain baillez, & en va querir d’aultres : & le pauvre pape s’en alloit pleurant, & quand il fut devant son maistre patissier, il luy dist, qu’on luy avoit ostez les pastez. Adonc le patissier luy bailla l’anguillade si bien que la peau n’eust riens vallu à faire cornemuses.
Ie veiz maistre Iean le mayre qui contrefaisoit du pape, & à tous ces pouvres roys & papes de ce monde faisoit baiser ses pieds : & en faisant du grobis leur donnoit la benediction, disant. Gaingnez les pardons coquins, gaignez, ilz sont à bon marché. Ie vous absouz de pain & de souppe : et vous dispense de ne valoir iamais riens, & appela Caillete & Triboulet, disant. Messieurs les cardinaulx, depeschez leurs bulles, & chascun ung coup de pau sus les reins : ce que fut faict incontinent. Ie veiz maistre François Villon qui demanda à Xerces combien la denrée de moustarde ? ung denier, dist Xerces, à quoy dist ledict de Villon : Tes fiebvres quartaines, villain, la blanchée n’en vault qu’un pinart, & tu nous surfaictz icy les vivres : & adoncques pissa dedans son bacquet, comme font les moustardiers à Paris.
Ie veiz le franc archier de Baignolet qui estoit inquisiteur des heretiques. Il rencontra Perseforest pissant contre une muraille en laquelle estoit painct le feu de sainct Antoine. Il le declaira heretique, & le eust faict brusler tout vif, n’eust esté Morgant qui pour son proficiat & aultres menuz droicts luy donna neuf muys de biere. Or, dist Pantagruel, reserve nous ces beaulx comptes à une aultre foys. Seullement dys nous comment y sont traictez les usuriers ?
Ie les veiz, dist Epistemon, tous occupez à chercher les espingles rouillées & vieulx clous, parmy les ruisseaux des rues, comme vous voyez que font les coquins en ce monde. Mais le quintal de ses quinquailleries ne vault qu’ung boussin de pain, encores y en a il maulvaise depesche : par ainsi les pouvres malautruz sont aulcunesfoys plus de troys sepmaines sans manger morceau ny miette : & à travailler iour & nuict attendant la foire à venir : mais de ce travail et de malheureté y ne leur souvient point tant ilz sont mauldictz & inhumains, pourveu qu’au bout de l’an ilz gaingnent quelque meschant denier.
Or, dist Pantagruel, faisons ung transon de bonne chere, & beuvons ie vous en prie enfans : car il fait beau boire. Lors degainnerent flaccons à tas, & des munitions du camp feirent grand chere. Mais le pouvre roy Anarche ne se povoit esiouyr.
Dont dist Panurge. De quel mestier ferons nous monsieur du Roy icy ? affin que il soit ia tout expert à l’art quand il sera de par delà à tous les diables.
Vrayement, dist Pantagruel, c’est bien aduisé à toy : or fais en à ton plaisir : ie te le donne. Grand mercy, dist Panurge, le present n’est pas de refus & l’ayme de vous.