N’i pooient saoulez estre.
Et as maigres moutons à destre,
Pourcelez, brebis et oigniaus,
Sont chien si cras touz et oisiaus,
Si haitié et si en bon point
Qu’as crasses ne tournoient point ;
Celle moult leur abelissoit,
Car chascuns si s’en encraissoit
Que ne vousissent autre avoir.
Or fui moult engrans du savoir
De cest affaire le mistere.
— « Biaus compains, c’est bien chose clere
Dist Veritez, « je t’aseüre,
Pluseurs voient ceste aventure
En cest monde, et à pluseurs gens
Est moult cis moustres biaus et gens
Se il i vouloient entendre.
Mais nenil ; il n’i font que tendre
Touz jours à amasser avoir
N’il n’en pueent leur soul avoir ;
Il n’ont onques joie asouvie.
Ainssi est d’eus, ne mescrois mie,
Con tu vois de ces oisiaus maigres
Et de ces chiens ; il sont si aigres
Sour les grans avoirs et richesces,
Les seignories, les hautesces
Et les grans honneurs de ce monde ;
N’onques en eus tant n’en habonde
Qu’il en puissent estre asouvis,
Ainz muerent sus de fain touz vis
Ne n’endurent à avaler
Ne de leur mains lessier aller.
Page:Watriquet de Couvin - Dits, édition Scheler, 1868.djvu/284
Cette page a été validée par deux contributeurs.
