Si m’en ting à bon eüré
Qu’ensi m’ot Diex aventuré
Que, pour amender mon usaige,
De compaignie bonne et saige
M’ot acointié et pourveü.
— « Compains, dist-elle, or as seü
La verité toute et la glose
Du tournoi. Encor mainte chose
Verras à plain et à demi
Ains que tu te partes de mi,
Où tu feras poi de demeure.
Or en alons à la bonne heure. »
Ci commence la parabole du Pont perilleus.
Ainssi le grand chemin ferré
Avons ensemble tant erré,
Elle à pié et je sans cheval,
Que nous trouvames en .i. val
Un pont très noble, riche et gent,
Où maint grant pueple avoit de gent
Qui tout erent là demorant ;
S’estoit la riviere courant
Desouz ce pont, si merveilleuse,
Si parfonde, noire et hideuse,
Que c’estoit une orribletez ;
Et li pons desus estoit tez
Qu’il n’ot si bel en nul pays.
Mais je deving touz esbahys
Quant je vi de ce pont de piere
L’uevre si tres riche et si chiere,
De si gente et noble fachon,
Et j’oi veü que li machon
Et li ouvrier communaument
L’orent fait sus un fondement
