Page:Villedieu - Mémoires de la vie de Henriette Sylvie de Molière, 1672.pdf/42

Cette page a été validée par deux contributeurs.
38
La vie de Henriette

aſſaſſinat, comme la Dame de Moliere le diſoit par tout ; Et enfin la Cour eſtant pour lors en Provence, ils m’obtinrent ma grace du Roy, avec toute ſorte d’avantages contre mes parties.

Mais la fortune qui n’avoit pas deſſein que je fuſſe long-temps ſans traverſes, afin d’avoir ſouvent le plaiſir de m’en relever, ne laiſſa point durer cette faveur. Birague qui m’en vouloit tout de bon, & qui eſtoit amy particulier du fils de Madame d’Engleſac, luy parla ſi ſouvent de moy, & du plaiſir qu’il y auroit à en eſtre aimé, que ce jeune Cavalier le crut, & me regarda pour luy-meſme. Ses yeux m’en parlerent, je n’y fus pas inſenſible ; & je puis l’avoüer ſans rougir, puiſque j’en ſeray juſtifiée par la ſuitte. Birague s’en apperceut, & en devint jaloux ; mais je dis jaloux à ne vouloir rien ménager pour me