assailloient assez souvent l’un l’autre. Si avint que le conte d’Armignac vint tout armé devant le chastel avec sa compaignie, et commença Girart à menacier et laidir de paroles. Quant Girart vit ce, si ne fu pas lié de ce qu’il le venoit laidir et ramposner[1] si près de son chastel. Si issi hors a tant de gent comme il pot avoir et si feri en ses anemis fort et hardiement, et encontra tout premierement le frere au conte[2] ; si le feri d’une lance si grant cop qu’il perça tout oultre le haubert et li trencha le foye et le cuer, et chei à terre tout mort. Après il courut sus à lui et aus siens, et chaplerent grant piece les uns sus les autres. A la parfin, il tint le conte si court qu’il convint par force qu’il s’enfuist, et Girart s’en torna en son chastel.
Après ce, ne demoura guéres que le conte d’Armignac fu entalenté de vengier sa honte et la mort de son frere. Si manda touz les plus nobles et les plus puissans de son linage, entre lesquiex le conte de Foiz[3] fu i des meilleurs et des plus riches. Si pristrent conseil ensemble qu’il iroient trebuchier le chastel de Casebonne et destruiroient Girart et toute sa mesnie. A Girart fu dit et conté la grant gent qui devoient venir sur li et que le conte de Fois estoit venu en l’aide au conte d’Armignac. Si vit bien qu’il ne pourroit durer contre si grant gent ; si se transmua et se mist en la garde et en la deffense le roi de France, et de ses senechaux et de ses bailliz qui representoient la personne
