il assambloient pour faire le service Nostre Seigneur ; si comme freres de l’ordre saint Dominique et autres assez ; si comme marcheans et pelerins et trespassans assez ; si comme gens s’espandent parmi le monde. Tantost comme le roy de Tunes sot la venue du roy de France, il les fist touz prendre et mettre en prisons vilaines et diverses ; et promist le roy de Tunes que tantost il seroient delivrez et demourroient franchement ou pays sanz nulle servitute de nulle riens. Les convenances dessus dites furent otroiées et escriptes et jurées et afermées d’une part et d’autre au miex que l’en pot et que l’en sot. Et delivra le roy de Tunes grant masse de fin or en paiant de la somme qui estoit otroié. Adonques fu pais criée parmi l’ost et commandé que nul ne feist mal aus Sarrazins sus la vie perdre. Quant la pais fu asseurée, aucuns des Sarrazins riches hommes vindrent veoir la contenance des François et des autres crestiens, et se merveillierent moult des nobles armes et du noble atour que il avoient, et des richesces qui estoient en l’ost. Si se humilierent moult et offrirent leurs services et leurs viandes et autres choses se mestier en avoient en l’ost.
Puisque pais fu faite[1], le roy de France et les autres barons ne vouldrent plus demourer ; si pristrent conseil quel part il iroient ; si regarderent qu’il ne pooient pas bien acomplir leur pelerinage en maniere que ce fust profit, meismement que leur gent estoit trop foible et touz langourex de maladies qu’il avoient eues devant Tunes. Et si estoit le legat mort[2] qui les devoit
