aporta l’en nouvelles que en Languedoc touz les mesiaux estoient ars, car il avoient confessé que touz les puis et les fontaines il avoient ou vouloient empoisonner, pour touz les Crestiens occirre et conchier de mesellerie ; si que le seigneur de Partenai li envoia souz son seel la confession d’un mesel de grant renon qui li avoit esté accusé sur ce qu’il recognut que i grant Juif riche l’avoit à ce encliné et donné x livres, et baillié les poisons pour ce faire ; et il avoit promis que se il pooit les autres mesiaux amener à ce faire, que il leur administreroit deniers et poisons. Et comme l’en li mandast la recepte de ces poisons, il dist qu’il estoient de sanc d’omme et de pissast et de trois manieres de herbes, lesquelles il ne sot nommer ou ne voult, et si y metoit-on le corps Jhesu Crist ; et puis tout ce on sechoit et en faisoit-on poudre que l’en metoit en sachiez que l’en lyoit à pierres ou à autre chose pesant, et la getoit-on en yaue ; et quant le sachet rompoit, si espandoit le venin.
Et tantost le roy Phelippe manda par tout le royaume que les mesiaux fussent touz pris et examinez ; desquiex pluseurs recognurent que les Juis leur avoient ce fait par deniers et par promesses, et avoient fait iiii conciles en divers pays, si que il n’avoit meselerie ou monde, fors que ii en Angleterre, dont aucuns n’i fust en l’une et en aportoient les poisons. Et leur donnoit-on à entendre que quant les grans seigneurs seroient mors, qu’il aroient leurs terres, dont il avoient jà devisié les royaumes, les contés et les eveschiez. Et disoit-on que le roy de Garnate, que les Crestiens avoient pluseurs foiz desconfist, parla aus Juis que il vousissent emprendre celle malefaçon, et il leur donroit as-
