de la cité, mais il mist une embusche dedenz la cité ; si furent les Guibelins si près pris que il ne porent plus issir, ne si ne leur pooit-on aporter vitaille. Quant les Guibelins virent ce, si manderent à Mahieu[1], capitaine de Melan, que il leur vousist aidier.
Et en ce meismes an, environ la feste de monseigneur saint Jehan Baptiste, il avint en Espaigne que i noble homme en armes et en proesce, tuteur et garde de l’enfant[2] du roy de Castelle, comme par sa prouesse et d’un sien oncle qui avoit à non Jehan, eussent moult de fois guerroié les Sarrasins, et tellement que on esperoit que en brief temps il eust conquis ledit royaume et mis en la main des Crestiens ; toutes foiz la chose fu autrement menée par la volenté de Dieu, et espoir[3], par noz pechiez. Car comme les noz fussent lm tant à cheval comme à pié, touz armez, contre vm de Sarrasins, si avint que avant que il se deussent combatre, ledit Jehan fu au lit malade et mourut. Quant ces nouvelles furent sceues en l’ost, il furent touz esbahiz, et par telle maniere, que jasoit ce que il veissent clerement la victoire estre à eulz attribuée, onques ne se vouldrent combatre celle journée. Et pour ceste cause, fu la mort dudit Jehan plus hastée, car il avoit crié et fait crier celle journée que on se combatist ; mais on n’en fist riens, dont il ot si grant doleur au cuer qu’il en mourut plus briefment.
