contre lesquiex inquisicion fu faite et furent trouvez herites manifestement et comme herites furent condampnez. Dont il avint que souvent il pristrent les messages du pape et les batirent et mistrent en prison, et les despoullierent et despecierent les lettres du pape, et si roberent pluseurs eglises et en metoient ceulz à qui elles estoient hors, et si en tuerent pluseurs ; evesques et abbés bouterent hors de leurs propres lieux et les envoierent en essil, et moult d’autres maux firent. Et par especial [par] ledit Mahieu fu entredit aus personnes de l’eglise[1], sennes, conseils, chapitres, visitacions, predicacions ; et si abusa ledit Mahieu de pluseurs pucelles, et depuis par force les mist en eglises ; et viola par force pluseurs nonnains. Et si nioit la resurrection, ou il en faisoit doubte. Son aiol et son aiole furent herites, et avec la Mainfrede qui estoit du linage audit Mahieu de par sa mere, laquelle tenoit le Saint Esperit avoir pris char humaine, furent ars en feu.
Et en ce temps, le pape fist moult de procès contre les devant dit nommés herites, et geta moult de sentences contre eulz, et donna grans indulgences à touz ceulz qui iroient à bataille contre eulz. Et environ yce temps, Loys de Baviere qui avoit esté coronné en roy des Romains[2] s’en entra en Ytalie et avec les devant dis herites s’acompaigna.
