Page:Viard - Grandes chroniques de France - Tome 8.djvu/346

quelle chose, Charles de Valoys entendue et de ce moult esbahi, lors au roy de Navarre Loys son neveu vint isnelment et li raconta touz felonnies, desloiaux et detestables fais ; lequel le roy, lors pourtraitoit envers le dit conte la delivrance dudit Engerran, et tant, si comme l’en dist, avoit ja fait et procuré envers ses adversaires, que ledit Engerran devoit passer mer et aler en Chipre ; et yleques, jusques au rapellement du devant dit conte Charles, et jusques à sa bonne volenté devoit estre, si comme l’en dit en essil condampnez, se ceste maudite aventure et fortunable endementres ne fust advenue. Et adonc, le roy Loys, ces felonnies entendues et ces dyaboliques felonnies faiz de la femme Engerran et par son consentement, lors si fu moult esbahi et dist à Charles son oncle : « Je oste de lui ma main et puis de ore en avant ne m’en entremet ; mais selon ce que vous verrez bien expedient et avenant li faites. » Adonc le roy Loys yce dit, Charles conte de Valoys, qui autre chose ne chaçoit fors le roys soy abstenir de lui deffendre, et qui avoit la dame de Marigni avec sa seur la dame de Chantelou fait prendre et dedens le Louvre à Paris fait metre en prison ; et l’autre boisteuse maudite, avec ledit Paviot, en Chastellet, les voulz avec eus admenez et aportés, avoit fait emprisonner et estre soustenuz en estroite garde. Lors adecertes, en yce fait non reposant, le samedi devant l’Ascension de Nostre Seigneur Jhesu Crist, si fist au Bois de Vinciennes pluseurs barons et chevaliers, avec aucuns pers de France assambler ; et ylec furent demonstrez aucuns des forfaiz Engorran de Marigni, et les autres detestables felonnies et dyablies de sa femme faites, et si comme l’en dist, de lui premierement pro-