l’appellacion contre le pape comme les cas de crime lesquielz par avant avoient esté proposés contre ledit pape Boniface, et se offri à les pourveoir, et requist a grant instance que les os dudit pape fussent desterrés tant comme herite et qu’il fussent ars. Mès la partie adverse, tant d’aucuns cardinaulz comme d’autres, deffendanz la partie du pape, s’opposa appertement, tant environ la sustance du fait comme contre la personne dudit Guillaume proposant moult de enormitez. Adonc fu mise ceste besoigne en suspens jusques atant que l’en eust plus plaine deliberacion.
Et en ce meismes an, en la tierce kalende de novembre[1], il vint i vent si soudain, lequel dura par i heure et plus, et trebucha moult d’arbres et de edifices. Et meismement le clocher de Saint Maclou de Pontoise, et les grans arches de pierre qui sont environ le chevez de l’eglise monseigneur saint Denis, ja soit ce que il ne cheirent pas ; si les vit l’en en telle maniere chanceler que l’en cuidoit qu’il deussent cheoir à terre.
Et en cest an, le derrenier jour de jenvier, après midi, fu veue l’eclipse du soleil ou milieu de lui, par une heure et xxiiii minutes. Et est à savoir que le centre de la lune fu emprès le centre du souleil. Et dura la dicte eclipse par ii heures naturelles et plus, et estoit la couleur de l’air aussi comme la coleur de saffran. Et la cause estoit, selon les astronomiens, car Jupiter, au point de l’eclipse, avoit la seigneurie entre les v planetes.
Et en ce meismes an, fu une très griève et aspre
- ↑ Le 30 octobre 1309.
