Page:Viard - Grandes chroniques de France - Tome 8.djvu/299

Le texte de cette page a été corrigé et est conforme au fac-similé.

toient ses cosins germains, et le conte Guillaume de Haynau son cousin germain qui nouvellement avoit pris à femme la fille messire Charles de France[1], et la greigneur partie des haus barons d’Alemaigne. Et avoit ja commencié ledit messire Henri sa xlne à Ais[2]. Et quant il ot parfait sa xlne, si le menerent les barons en la chapelle d’Aes et ilec le coronerent à roy d’Alemaigne. Quant le vaillant roy de Lucembourc ot porté coronne à Es en la Chapelle, le conte de Flandres et le conte de Haynaut pristrent congié à lui en li offrant leurs services. Et depuis fist le roy son appareil moult grant pour aler à Rome. Si avint, une piece de temps après qu’il ot son arroy assamblé, si fist assambler grant foison de chevaliers, lesquiex il mena avec li, et passerent Alemaigne, et puis entra ledit roy en la duchée de Quarentaine[3], et là li fu offerte toute obeissance, et puis passa les mons et entra en Lombardie. Tantost ceulz de Pade[4] se rendirent à lui, et ylec sejourna, et attendi ses gens ; mais tantost que ceulz de Melan le sorent, il y envoierent leurs ambassateurs en li presentant la ville de Melan du tout à son commendement, lesquiex il reçut moult benignement à sa grâce, puis se departirent de li, et leur donna grans dons et leur commanda que il deissent à ceulz de Milan, que briefment les yroit veoir pour estre coronné. Après i pou de temps assambla son ost et fist messire Guy de Namur son mareschal, et envoia ses

  1. Guillaume Ier, comte de Hainaut, avait épousé par traité du 19 mai 1305 Jeanne de Valois, sœur de Philippe de Valois.
  2. Ais, Aix-la-Chapelle.
  3. Quarentaine, la Carinthie.
  4. Pade, Padoue.