Page:Viard - Grandes chroniques de France - Tome 8.djvu/273

Le texte de cette page a été corrigé et est conforme au fac-similé.

Charles conte de Valois, Loys conte d’Évreux, freres Phelippe le roy de France, Gui conte de Saint Pol, Jehan conte de Dammartin, nobles chevaliers et autres grans maistres, pluseurs contes, dux et barons et chevaliers, avec les autres nobles compaignies à pié et à cheval, es Flamens, lors isnelment se plungierent et embatirent, et vers le roy se traistrent. Lors adonc yceulz nobles, avec leur noble et forte compaignie à pié et à cheval, la bataille entre eulz merveilleusement forte et aspre fu faite. Mais les Flamens, du tout en tout furent obruez et acraventez, et de eulz fu faite grant occision et mortalité, et si grant abateis qu’il ne porent plus arrester ; mais la fuite très laide pristrent, delaissant charretes et charioz atout leur appareil bataillerez. Et adecertes, pour voir, se la nuit oscure venant n’eust la bataille empeeschiée, pou de si grant nombre de Flamens en fust eschapé, que mort du tout en tout ne fussent. Et ainsi la bataille parfaite et fenie, nostre roy Phelippe, noble batailleur, a torches de cire alumées, de la bataille s’en revint aus tentes avec sa noble chevalerie. Et ainsi, comme il fu dit pour voir, que se ycil roys de France Phelippe le Biaux ne se fust contenuz si noblement ou si vertueusement, ou se en aucune maniere il eust monstré la queue de son cheval aus Flamens pour soy retourner, tout l’ost des François eust ramené aussi comme à noient, ou par aventure desconfit. Adecertes en ycelle bataille des Flamens fu occis i noble chevalier et le chief copé, Guillaume de Juilliers[1], et li copa Jehan de Dammar-

  1. Guillaume de Juliers le jeune, fit Guillaume le Clerc, prévôt de l’église de Maestricht et archidiacre de Liége, était fils